X

स्व. टिकाराज गैरेको सम्झनामा नेपाली कांग्रेस पाल्पाद्वारा श्रद्धाञ्जली सभा

• 
  भैरब प्रेस संवाददाता
• 5 months ago

पाल्पा — नेपाली कांग्रेस पाल्पाले पार्टीका सल्लाहकार स्वर्गीय टिकाराम गैरेको स्मृतिमा शुक्रबार श्रद्धाञ्जली सभा आयोजना गरेको छ । रिब्दिकोट गाउँपालिका–१ स्थित स्व. गैरेको निवासमै सम्पन्न कार्यक्रममा पार्टीका नेतादेखि स्थानीय कार्यकर्ता र शुभेच्छुकहरूको उल्लेख्य उपस्थिति रहेको थियो । कार्यक्रमको अध्यक्षता नेपाली कांग्रेस रिब्दिकोट वडा नं. १ का सभापति पदमप्रसाद न्यौपानेले गर्नुभएको थियो भने प्रमुख अतिथिको रूपमा नेपाली कांग्रेस पाल्पाका सभापति हिमाल दत्त श्रेष्ठ सहभागी हुनुभएको थियो । शाेक सभामा पाटीका प्रवक्ता शोभाकर न्यौपाने, महासमिति सदस्य विधान श्रेष्ठ, महाधिवेशन प्रतिनिधि शिवचन्द्र खनाल र कान्ता अधिकारी, जिल्ला सदस्य कमल राना र गिरिजा गैरे, प्रदेशसभा सदस्य भानुभक्त पाण्डेय, आमन्त्रित सदस्य विष्णु पराजुली, तानसेन वडा नं. १४ का सभापति दधिराम न्यौपाने, तानसेन नगर समिति सदस्य हरि पराजुली लगायतको सहभागिता रहेको थियो ।

स्व. गैरे २०४६ सालदेखि नेपाली कांग्रेसमा आवद्ध रहँदै पार्टीको विभिन्न तहमा सक्रिय रूपमा क्रियाशील रहनुभएको थियो । उहाँले वडा, गाउँपालिका र जिल्ला तहसम्मका जिम्मेवारी सम्हाल्दै संगठन सुदृढीकरणमा उल्लेखनीय योगदान दिनुभएको थियो । राजनीतिक जीवनसँगै उहाँले सामाजिक सेवामा पनि अग्रणी भूमिका निर्वाह गर्नुभएको थियो । रिब्दिकोट क्षेत्रको शिक्षा, स्वास्थ्य, बाटो र अर्गली कुला निर्माणजस्ता क्षेत्रमा उहाँले पुर्‍याएको योगदानको स्थानीयवासीहरूले उच्च मूल्याङ्कन गरेका छन्  ।

श्रद्धाञ्जली सभामा बोल्दै नेपाली कांग्रेस पाल्पाका सभापति हिमाल दत्त श्रेष्ठले स्व. गैरेको निधनले पाल्पाको राजनीतिक तथा सामाजिक क्षेत्रमा अपूरणीय क्षति पुर्‍याएको बताउनुभयो । “गैरे पार्टीका लागि सधैं समर्पित, इमानदार र अनुशासित व्यक्तित्व हुनुहुन्थ्यो,” सभापति श्रेष्ठले भन्नुभयाे , “उहाँको योगदानले पाल्पा कांग्रेसको संगठनात्मक जग बलियो बनाउन ठूलो भूमिका खेलेको छ ।” अन्य वक्ताहरूले पनि स्व. गैरेको जीवनबाट प्रेरणा लिनुपर्ने र उहाँको त्याग, अनुशासन र सेवाभावलाई पार्टी र समाजका लागि मार्गदर्शनका रूपमा अघि बढाउनुपर्नेमा जोड दिएका थिए ।

कार्यक्रममा सहभागीहरूले स्व. गैरेको तस्वीरमा माल्यार्पण गर्दै एक मिनेट मौनधारण गरेर उहाँप्रति श्रद्धाञ्जली अर्पण गरेका थिए । अन्त्यमा उहाँको आत्माको चीरशान्तिको कामना गर्दै परिवारजनप्रति गहिरो समवेदना व्यक्त गरिएको थियो । श्रद्धाञ्जली सभाले स्व. गैरेको योगदान र व्यक्तित्वलाई स्मरण गर्दै पाल्पाको राजनीतिक इतिहासमा उहाँले छोडेको प्रेरणादायी पाटोलाई पुनः उजागर गरेको सहभागीहरूले बताएका छन् ।