सिड्नीमा गुल्मीका बिकलको चमक, अन्तर्राष्ट्रिय तेक्वान्दो च्याम्पियनशिपमा रजत पदक जिते
-
भैरब प्रेस संवाददाता
- 1 year ago
अष्ट्रेलियाको सिड्नीमा सम्पन्न ‘New South Wales International Open Taekwondo Championship 2025’ मा नेपालका लागि गौरवपूर्ण सफलता हासिल गर्दै गुल्मी, रिडीका बिकलले रजत पदक जितेका छन् ।
विभिन्न राष्ट्रका खेलाडीहरूको सहभागीता रहेको यो प्रतिष्ठित अन्तर्राष्ट्रिय प्रतियोगिता अत्यन्तै प्रतिस्पर्धात्मक वातावरणमा सम्पन्न भएको थियो । बिकलले Kyorugi (लडाइँ) विधामा नेपालको प्रतिनिधित्व गर्दै आफ्नो उत्कृष्ट प्रदर्शनमार्फत फाइनलसम्मको यात्रा तय गरे ।
फाइनल खेलमा केही अंकले पछि परे पनि बिकलको प्रदर्शन गतिशीलता, लचकता, आत्मविश्वास र रणनीतिका हिसाबले अत्यन्तै प्रशंसायोग्य रह्यो। उनले प्रतिस्पर्धाको प्रत्येक चरणमा आत्मविश्वासपूर्वक खेल्दै दर्शकहरूलाई समेत प्रभावित पारे । बिकल यसअघि पनि राष्ट्रिय तथा अन्तर्राष्ट्रिय तेक्वान्दो प्रतियोगिताहरूमा सफलता हात पारिसकेका अनुभवी र समर्पित खेलाडी हुन् । उनको अनुशासन, कडा मेहनत र देशप्रतिको माया नै उनलाई निरन्तर सफलताको शिखरतर्फ डोर्याइरहेको छ ।
उनको यो सफलताले नेपाली तेक्वान्दो खेलमा थप हौसला, प्रेरणा र अन्तर्राष्ट्रिय स्तरमा पहिचान दिलाउने कार्य गरेको छ । यसैबीच, नेपाल तेक्वान्दो संघ, खेलप्रेमीहरू र बिकलका समर्थकहरूले उनलाई बधाइ तथा शुभकामना दिएका छन् ।
Comments