X

६० औं अन्तर्राष्ट्रिय जातीय विभेद उन्मूलन दिवसकाे अवसरमा तानसेनमा अन्तरक्रिया कार्यक्रम सम्पन्न

• 
  भैरब प्रेस संवाददाता
• 1 year ago

पाल्पाको तानसेन नगरपालिकामा ६० औं अन्तर्राष्ट्रिय जातीय विभेद उन्मूलन दिवसको अवसरमा "जातीय विभेद उन्मूलनमा हाम्रो भूमिका" विषयक अन्तरक्रिया कार्यक्रम सम्पन्न भएको छ । कार्यक्रम तानसेन नगरपालिकाका नगर प्रमुख सन्तोष लाल श्रेष्ठको प्रमुख आतिथ्यतामा सम्पन्न भएको थियाे ।  कार्यक्रममा जिल्लाका विभिन्न स्थानीय तहका जनप्रतिनिधिहरू, नगरका दलित अगुवाहरू, युवा पुस्ता, जनवर्गीय संघसंस्थाका प्रतिनिधिहरू, प्रशिक्षकहरू तथा सामाजिक अभियन्ताहरूको उल्लेखनीय उपस्थिति रहेको थियो ।

कार्यक्रमका प्रमुख अतिथि तानसेन नगरपालिकाका नगर प्रमुख श्रेष्ठले जातीय विभेदको अन्त्यका लागि स्थानीय सरकार प्रतिबद्ध रहेको बताउँदै नगरपालिकाले शिक्षा, रोजगार, सामाजिक जागरण तथा कानुनी सहायता जस्ता क्षेत्रमा प्राथमिकता दिइरहेको बताउनुभयो । समाजमा रहेका सबै समुदायलाई समान अवसर सुनिश्चित गर्न नगरपालिकाले विशेष कार्यक्रमहरू सञ्चालन गरिरहेको बताउनुभयो । 

नगर प्रमुख श्रेष्ठले विभेदविरुद्धको अभियानलाई स्थानीयस्तरमा व्यापक बनाउन जनप्रतिनिधि, संघसंस्था, युवा पुस्ता र सम्पूर्ण समुदायको सहकार्य आवश्यक रहेको बताउनुभयाे ।  सबै तहका सरकार, नागरिक समाज र समुदायको संयुक्त प्रयासबिना विभेद उन्मूलन सम्भव नहुने बताउदै सबै मिलेर अभियानलाई अघि बढाउनुपर्ने आवश्यकता रहेको बताउनुभयो । उहाले जातीय विभेद अन्त्यका लागि शिक्षा नै प्रमुख कुरा रहेकाे कुरा बताउदै दलित समुदायलाई शिक्षा तथा सीपमूलक तालिममा जोड दिन नगरपालिकाले निरन्तर पहल गरिरहेको बताउनुभयाे । कार्यक्रममा तानसेन नगरपालिकाका उप प्रमुख प्रतिक्षा सिङ्जाली,प्रमुख प्रशासकिय अधिकृत पिताम्बर पाण्डेय लगाएतकाे उपस्थिति रहेको थियाे ।

कार्यक्रममा जातीय विभेद उन्मूलनका लागि कानुनी व्यवस्था मात्र पर्याप्त नभई समाजमा चेतनाको अभिवृद्धि आवश्यक रहेको विषयमा गहन छलफल गरिएको थियो । स्थानीय सरकारको भूमिकालाई प्रभावकारी बनाउँदै समुदायस्तरबाट नै विभेदविरुद्धको अभियान सञ्चालन गर्नुपर्नेमा दलित अधिकारकर्मीहरू सुर्य प्रसाद दर्नाल,बल बहादुर गन्धर्व,तिर्थ प्रसाद गाैतम जोड दिनुभएको थियो ।  कार्यक्रममा सहभागी जनप्रतिनिधिहरूले जातीय विभेद समाजमा गहिरो रूपमा व्याप्त रहेको उल्लेख गर्दै यसको अन्त्यका लागि सबै तहका सरकार, नागरिक समाज, संघसंस्था, युवा पुस्ता र समुदायबीच समन्वय हुनुपर्ने धारणा राख्नु भएको थियाे । 

कार्यक्रमकाे अवसरमा हालै सम्पन्न स्ववियु निर्वाचनमा दलित समुदायबाट निर्वाचित विद्यार्थी नेताहरूलाई विशेष सम्मान प्रदान गरिएको थियो । उहाहरूलाई सम्मानपत्र प्रदान गर्दै जातीय विभेद उन्मूलनमा उहाहरूको भूमिकालाई सशक्त बनाउन प्रोत्साहित गरिएको थियो । कार्यक्रममा बोल्दै दलित जनप्रतिनिधि जिल्ला संयोजक दिनेश गन्धर्वले जातीय विभेदको अन्त्यका लागि कानुनी प्रबन्धहरू भए पनि व्यवहारमा अझै धेरै चुनौतीहरू रहेको बताउनुभयाे ।  दलित समुदायका लागि शिक्षा, रोजगार, आर्थिक सशक्तिकरण तथा राजनीतिक सहभागिता अभिवृद्धि गर्नुपर्ने आवश्यकता औंल्याउँदै सबै पक्षको सहकार्य अनिवार्य रहेको उल्लेख गर्नुभयाे । जातीय विभेद विरुद्धको अभियानलाई बलियो बनाउन समुदायस्तरबाट सचेतना कार्यक्रम, कानुनी परामर्श तथा नीति निर्माणका लागि दबाबमूलक गतिविधिहरू सञ्चालन गर्नुपर्नेमा उहाको विशेष जोड थियो । समाजमा समानता, न्याय र समावेशीकरणलाई संस्थागत गर्न जातीय विभेदविरुद्धको अभियानलाई अझ व्यापक बनाउने कुरामा केन्द्रीत रहि प्रशिक्षक कृष्ण गहतराजले प्रशिक्षण दिनु भएको थियाे । कार्यक्रम दलित जनप्रतिनिधि पाल्पा जिल्ला अध्यक्ष दिनेश गन्धर्वकाे अध्यक्षतामा सम्पन्न भएको थियाे ।