X

रूरू गौसेवा आश्रमद्वारा गाई पालन सहयोगार्थ मंसिर १९ देखि २५ सम्म महायज्ञ हुने

• 
  भैरब प्रेस संवाददाता
• 4 months ago

पाल्पामा सडकमा बेवारिसे अवस्थामा रहेका गाईहरूको संरक्षण तथा पालन–पोषणका लागि रूरू गौसेवा आश्रम, तानसेन नगरपालिका–१४ कुसेनीले भविष्यपुराण गो आराधना धान्याचाल महायज्ञ आयोजना गर्ने भएको छ । मंगलबार तानसेनमा गरिएको पत्रकार सम्मेलनमा महायज्ञको तयारी पूरा भएको जानकारी आयोजकले दिनुभएकेा छ । मंसिर १९ देखि २५ गतेसम्म सञ्चालन हुने महायज्ञमा दीपोत्सव, करोड दीप प्रज्वलन, गौ महाआरति, विशाल भण्डारा तथा भजन प्रतियोगिताजस्ता विविध कार्यक्रमहरू रहनेछन् । भजन प्रतियोगितामा प्रथमदेखि सान्त्वना स्थानसम्मका विजेताले क्रमशः रु. २५ हजार, १५ हजार, १० हजार र ५ हजार पुरस्कार प्राप्त गर्नेछन् । महायज्ञ सञ्चालनमा करिब ५ लाख खर्च हुने र करिब १० लाख लाभ हुने अनुमान गरिएको गौशालाका प्रमुख संरक्षक शंकर गिरीले जानकारी दिनुभयो ।

महायज्ञ अवधिभर पूजापाठ, पाठपरायण, दैनिक हवन, रुद्री, चण्डी, गीता तथा वेद पाठ सञ्चालन गरिने गौसेवा आश्रमकी उपाध्यक्ष सीता ज्ञवालीले बताउनुभयेा । ‘रूरू धामस्थित गौशाला जाऔं, १०८ गाईको दर्शन गरौं, घाँस–पराल तथा दान अर्पण गरौं, पुण्य कमाऔं’ भन्ने नारासहित महायज्ञ आयोजना गरिएको आश्रमका संस्थापक अध्यक्ष राजु राणा मल्लले बताउनुयो । टाढाबाट आउने भक्तजनका लागि खानेबस्ने व्यवस्थासमेत मिलाइएको छ, जसले दर्शनार्थीलाई सहज वातावरण प्रदान गर्ने अपेक्षा गरिएको छ।

रूरू धामस्थित गौशालामा अहिले १३५ वटा गाई रहेका छन् । सडकमा छाडिएका बेवारिसे गाईलाई उद्धार गरी सुविधायुक्त गोठमा राखेर संरक्षण गर्ने कार्य आश्रमले निरन्तर सञ्चालन गर्दै आएको छ । गाई पालनमा वार्षिक ३५ लाख खर्च हुने गरेको छ भने एउटा गाईको मासिक खर्च करिब रु. २,१०० रहेको संरक्षक गिरीले बताउनुभयो । गाईको दैनिकी व्यवस्थापनका लागि नियमित तथा ज्यालादारी गरी करिब १५ जना कर्मचारी कार्यरत छन्, जसले गाईको हेरचाह, स्वास्थ्य, गोठको सरसफाइ तथा दाना व्यवस्थापनमा सहयोग पुर्‍याइरहेका छन् ।

गौशालाको सञ्चालनमा विभिन्न व्यक्ति, संघ–संस्था तथा स्थानीय सरकारले सहयोग गर्दै आएका छन् । दूध, दही, घ्यू तथा गोबर बिक्रीबाट आश्रमले केही आम्दानी जुटाए पनि बेवारिसे गाईको बढ्दो सङ्ख्या र उच्च खर्चका कारण थप स्रोत आवश्यक हुँदै आएको आयोजकहरूको भनाइ छ । यसै कारण आर्थिक सुदृढीकरण, धार्मिक भावनाको विस्तार तथा गाई संरक्षण अभियानलाई थप प्रभावकारी बनाउन यो महायज्ञ महत्वपूर्ण हुने विश्वास व्यक्त गरिएको छ ।