X

विद्यालयस्तरको क्रिकेट च्याम्पियनसिप पाल्पामा सुरु !

• 
  भैरब प्रेस संवाददाता
• 1 week ago

पाल्पामा विद्यालयस्तरको क्रिकेट विकासलाई नयाँ उचाइमा पुर्‍याउने उद्देश्यले “विद्यालयस्तरको क्रिकेट च्याम्पियनसिप ” क्रिकेट प्रतियोगिता सुरु भएको छ। नेपाल क्रिकेट संघको वार्षिक कार्यक्रम अन्तर्गत सञ्चालन गरिएको यस प्रतियोगिताले जिल्लाभरिका विद्यालयहरूबीच प्रतिस्पर्धात्मक वातावरण सिर्जना गर्नुका साथै युवा खेलाडीहरूलाई आफ्नो प्रतिभा प्रदर्शन गर्ने महत्वपूर्ण अवसर प्रदान गरेको छ।

जिल्ला क्रिकेट संघ पाल्पाको आयोजनामा सञ्चालन भएको उक्त प्रतियोगिता एसजी स्पोर्ट्सको मुख्य प्रायोजन तथा क्रिकमाण्डुको सह–प्रायोजनमा सम्पन्न भइरहेको छ। प्रतियोगितामा पाल्पा जिल्लाका कुल १५ वटा विद्यालयहरूको सहभागिता रहेको छ, जसले विद्यालयस्तरमै क्रिकेटको लोकप्रियता र आकर्षण बढ्दै गएको संकेत गर्दछ। यस प्रकारका प्रतियोगिताले भविष्यका राष्ट्रिय खेलाडी उत्पादन गर्न महत्वपूर्ण भूमिका खेल्ने विश्वास गरिएको छ । उद्घाटन खेल शारदा माध्यमिक विद्यालय, तानसेन–८ र विन्दावन एकाडेमीबीच सम्पन्न भएको थियो। प्रतिस्पर्धात्मक खेलमा शारदा माविले उत्कृष्ट प्रदर्शन गर्दै ३० रनको अन्तरले जित हासिल गरेको छ। खेल अवधिभर दुवै टिमका खेलाडीहरूले उच्च स्तरको खेल कौशल प्रदर्शन गरेका थिए, जसले दर्शकहरूलाई निकै उत्साहित बनाएको थियो । विशेषगरी शारदा माविका ब्याट्सम्यान र बलरहरूको सन्तुलित प्रदर्शन जितको प्रमुख आधार बन्यो ।

प्रतियोगिताको उद्घाटन समारोह जिल्ला क्रिकेट संघ पाल्पाका कार्यवाहक अध्यक्ष शैलेन्द्र भट्टराईको अध्यक्षतामा सम्पन्न भएको थियो। कार्यक्रममा स्थानीय खेलप्रेमी, शिक्षक, विद्यार्थी तथा सरोकारवालाहरूको उल्लेखनीय उपस्थिति रहेको थियो । खेल संयोजक तथा जिल्ला क्रिकेट संघ पाल्पाका सदस्य पुर्न राज शाक्यका अनुसार यस प्रतियोगिताको मुख्य उद्देश्य विद्यालयस्तरबाटै क्रिकेट खेलको विकास गर्नु, नयाँ प्रतिभाहरू पहिचान गर्नु तथा उनीहरूलाई उचित प्लेटफर्म उपलब्ध गराउनु रहेको बताउनुभयो । उहाले  विद्यालयस्तरमा यस्ता प्रतियोगिता आयोजना हुँदा खेलाडीहरूले प्रतिस्पर्धात्मक अनुभव प्राप्त गर्छन्, जसले भविष्यमा प्रदेश तथा राष्ट्रिय स्तरसम्म पुग्न मद्दत पुर्‍याउँने बताउनुभयो । प्रतियोगिताका आगामी खेलहरू अझ रोचक र प्रतिस्पर्धात्मक हुने अपेक्षा गरिएको छ । प्रतियोगिताले पाल्पामा क्रिकेटको आधार बलियो बनाउँदै नयाँ खेलाडी उत्पादनमा महत्वपूर्ण योगदान पुर्‍याउने विश्वास गरिएको छ । विद्यालयस्तरको क्रिकेट च्याम्पियनसिपले पाल्पाका लागि मात्र नभई समग्र नेपाली क्रिकेटको भविष्यका लागि पनि एक महत्वपूर्ण अभियानको रूपमा हेरिएको छ। यस्ता कार्यक्रमले खेल संस्कृतिको विकास गर्दै युवाहरूलाई सकारात्मक दिशामा अगाडि बढ्न प्रेरित गर्ने विश्वास लिएको छ ।