X

श्रीनगर यातायात तथा सेवा कम्पनी प्रा.लीले आधुनिक सुविधासहित “नमस्ते तानसेन” बस सेवा शुभारम्भ

• 
  भैरब प्रेस संवाददाता
• 1 week ago

पाल्पा जिल्लाको ऐतिहासिक तथा सांस्कृतिक पहिचान बोकेको तानसेनबाट संघीय राजधानी काठमाडौंसम्म “नमस्ते तानसेन” नामक अत्याधुनिक रात्रिबस सेवा सञ्चालनमा ल्याइएको छ । श्रीनगर यातायात सेवा कम्पनी प्रा.लि.ले शुक्रबार तानसेनमा पत्रकार भेटघाट कार्यक्रम आयोजना गर्दै नयाँ बस सेवाबारे जानकारी गराएको हो ।  कम्पनीले यात्रुको सुरक्षा, सुविधा र सम्मानलाई केन्द्रमा राखेर सेवा सञ्चालन गरिएको जनाएको छ । कार्यक्रमका प्रमुख अतिथि तानसेन नगरपालिकाका नग प्रमुख सन्तोष लाल श्रेष्ठले पाल्पाबाट काठमाडौंसम्म आधुनिक र व्यवस्थित यातायात सेवा सञ्चालन हुनु जिल्लाकै लागि गौरवको विषय भएको बताउनुभयो । उहाँले समयअनुसार प्रविधिमैत्री तथा यात्रुमैत्री सार्वजनिक यातायात सेवा आवश्यक रहेको उल्लेख गर्दै “नमस्ते तानसेन” बस सेवाले पाल्पाको पर्यटन, व्यापार र शिक्षासँगै आर्थिक गतिविधिलाई समेत टेवा पुग्ने विश्वास व्यक्त गर्नुभयो ।

नगर प्रमुख श्रेष्ठले पाल्पाको पहिचान बोकेको “नमस्ते तानसेन” नामले जिल्लाको आत्मीयता र संस्कृतिलाई राष्ट्रियस्तरमा परिचित गराउने धारणा राख्नुभयो । उहाँले सुरक्षित यात्रा नागरिकको अधिकार भएकाले यातायात व्यवसायीले यात्रुको सुरक्षामा विशेष ध्यान दिनुपर्ने बताउँदै श्रीनगर यातायात सेवा कम्पनीले सुरु गरेको सेवा अनुकरणीय रहेको उल्लेख गर्नुभयो ।

पत्रकार भेटघाट कार्यक्रममा कम्पनीका अध्यक्ष डिल बहादुर ढुङ्गानाले यात्रुको माग र आवश्यकतालाई मध्यनजर गर्दै आधुनिक सुविधासहितको सुपर डिलक्स रात्रिबस सञ्चालन गरिएको जानकारी दिनुभयो । उहाँका अनुसार कम्पनीले दुईवटा बस खरिद गर्न प्रति बस एक करोड तीन लाख ७० हजार रुपैयाँ लगानी गरेको छ ।

अध्यक्ष ढुङ्गानाले विगतदेखि नै पाल्पा तथा छिमेकी जिल्लाका ग्रामीण क्षेत्रमा जीप सेवा सञ्चालन गर्दै आएको स्मरण गर्दै अहिले समयको आवश्यकता अनुसार प्रविधियुक्त सेवा विस्तार गरिएको बताउनुभयो । उहाँले अब यात्रुलाई घरदैलो सेवा, अनलाइन टिकट बुकिङ, इजी टिकट सेवा तथा सहुलियत दरमा यात्रा सुविधा उपलब्ध गराइने जानकारी दिनुभयो । “संस्कार र सेवा नै श्रीनगरको पहिचान” भन्ने मूल नारासहित सञ्चालनमा ल्याइएको “नमस्ते तानसेन” बस सेवामा यात्रुको आराम र सुरक्षालाई विशेष प्राथमिकता दिइएको कम्पनीले जनाएको छ । बसमा २र२ आधुनिक सोफा सिट, वातावरण अनुकूलित एसी सेवा, निःशुल्क इन्टरनेट, मोबाइल चार्जिङ सुविधा, सीसीटीभी क्यामेरा, एलईडी डिस्प्लेमा संगीत तथा चलचित्र मनोरञ्जनको व्यवस्था गरिएको छ । साथै आठ जनासम्म क्षमताको स्लीपर बेड, पिउनेपानी तथा सिस्टम इन्टरलक जस्ता सुविधा पनि समावेश गरिएको कम्पनीले जनाएको छ ।

बस तानसेन र काठमाडौं दुवैतर्फबाट दैनिक बेलुका खाना खाइसकेपछि साँझ ७स्३० बजे बस छुट्नेछ । नेपाल सरकारले निर्धारण गरेअनुसार यात्रुभाडा एक हजार ६ सय ५० रुपैयाँ कायम गरिएको छ । कार्यक्रममा कम्पनीका प्रतिनिधिहरूले यात्रुको सुरक्षालाई उच्च प्राथमिकतामा राखेर अनुभवी चालक तथा सहचालकको व्यवस्था गरिएको जानकारी दिएका थिए । सवारी साधनको नियमित फिटनेस परीक्षण, गति नियन्त्रण, जोखिमयुक्त सडकमा निगरानी तथा समयपालनलाई कडाइका साथ लागू गरिने प्रतिबद्धता पनि कम्पनीले जनाएको छ । श्रीनगर यातायात सेवा कम्पनीले सार्वजनिक यातायात क्षेत्रमा आधुनिक प्रविधि भित्र्याउँदै पहिलोपटक ईभी सेवा सञ्चालनतर्फ समेत अग्रसर भएको जनाएको छ । कम्पनीका अनुसार आगामी दिनमा यात्रुको आवश्यकता र समयको मागअनुसार थप प्रविधिमैत्री सेवा विस्तार गरिने जनाएको छ । कार्यक्रममा नेपाल पत्रकार महासंघ पाल्पाका अध्यक्ष कमल राज तिमिल्सिना, जिल्लास्थित विभिन्न राजनीतिक दलका प्रमुख तथा सञ्चारकर्मीहरूको उपस्थिति रहेको थियो । कार्यक्रमको सञ्चालन कम्पनी सचिव भविन्द गौतमले गर्नुभएको थियो ।