X

पाल्पामा ‘प्रथम बर्तुङ्ग खाना महोत्सव तथा सांस्कृतिक कार्यक्रम २०८३’ सम्पन्न

• 
  भैरब प्रेस संवाददाता
• 1 week ago

पाल्पाको बर्तुङ्ग क्षेत्रमा स्थानीय रैथाने खानाको प्रवर्धन, संरक्षण तथा संस्कृतिको जगेर्ना गर्ने उद्देश्यले आयोजित ‘प्रथम बर्तुङ्ग खाना महोत्सव तथा सांस्कृतिक कार्यक्रम २०८३’ सम्पन्न भएको छ । स्थानीय परिकार, संस्कृति र परम्परालाई एकै थलोमा प्रस्तुत गरिएको महोत्सवले स्थानीयवासी तथा आगन्तुकहरूको उल्लेखनीय आकर्षण बटुलेको आयोजकले जनाएका छन । महोत्सव मूल आयोजक समितिका अध्यक्ष भूमिकला बुढाथोकीले अपेक्षाभन्दा राम्रो सहभागिता र प्रतिक्रिया प्राप्त भएको बताउनुभयो । उहाँले भन्नुभयो, “हामीले सोचेभन्दा धेरै राम्रो प्रतिक्रिया पायौं । स्थानीय रैथाने खानाको संरक्षणसँगै नयाँ पुस्तालाई आफ्नै संस्कृतिसँग जोड्ने उद्देश्य पूरा भएको महसुस गरेका छौं,”उहाले बताउनुभयाे ।  महोत्सवमा विभिन्न जातजाति तथा समुदायका लोपोन्मुख अवस्थामा पुगेका परिकारहरू प्रदर्शनका साथै बिक्रीका लागि राखिएका थिए । बटुक, चुकाउनी, पकौडा, सेलरोटी, योमरी लगायतका परम्परागत खानाले आगन्तुकहरूको ध्यान आकर्षित गरेका थिए । स्थानीय सुर्दशन कोइरालाले यस्ता कार्यक्रमले हराउँदै गएका खानाका परिकारलाई पुनर्जीवन दिन सहयोग पुग्ने बताउनुभयाे । उहाँले भन्नुभयो, “हाम्रा पुराना परिकार अहिले विस्तारै हराउँदै गएका छन् । यस्ता महोत्सवले ती परिकारलाई पुनः चिनाउने अवसर दिएको छ।”

महोत्सवमा विशेष आकर्षणको रूपमा पाल्पाको लोकप्रिय रैथाने परिकार ‘बटुक’ लाई प्राथमिकताका साथ प्रवर्धन गरिएको थियो । तानसेन वडा न ६ कि वडा सदस्य रेखा विष्टले बटुक पाल्पाको पहिचानसँग जोडिएको परिकार भएकाले यसको प्रचार आवश्यक रहेको बताउनुभयो । उहाँले भन्नुभयो, “बटुक पाल्पाको मौलिक स्वाद हो,यसको महत्व नयाँ पुस्तासम्म पुर्‍याउन यस्ता कार्यक्रम आवश्यक छन् । आगन्तुकहरूलाई आकर्षित गर्न महोत्सवमा बटुक बनाउने प्रत्यक्ष विधि समेत प्रस्तुत गरिएको थियो । सहभागीहरूले परम्परागत शैलीमा बटुक तयार पार्ने तरिका नजिकबाट अवलोकन गर्नुका साथै स्वाद लिन पाएका थिए । यसले स्थानीय खानाप्रतिको चासो अझ बढाएको आयोजकको भनाइ छ ।

महोत्सवमा १५ भन्दा बढी खानाका स्टलहरू राखिएका थिए । ती स्टलहरूमा स्थानीय उत्पादन र परिकारहरू प्रदर्शन तथा बिक्री गरिएको थियो । एउटै स्थानमा विविध स्थानीय स्वादहरूको अनुभव लिन पाउँदा आगन्तुकहरू उत्साहित देखिनुहुनि थियो  । खाना महोत्सवसँगै विविध सांस्कृतिक कार्यक्रम पनि आयोजना गरिएको थियो । स्थानीय कलाकारहरूले लोकगीत तथा सांस्कृतिक नृत्य प्रस्तुत गरेका थिए । कार्यक्रममा स्थानीय कला, संस्कृति र परम्पराको झल्को दिने प्रस्तुतिहरूले थप रौनकता थपेको थियो । स्थानीय उत्पादन, पर्यटन तथा संस्कृतिको संरक्षणमा यस्ता कार्यक्रमले सकारात्मक योगदान पुर्‍याउने विश्वास आयोजक तथा स्थानीयवासीले व्यक्त गर्नुभएकाे छ ।